Қарт жауынгермен кездесу

          Көкшетау облысы, Красный Яр ауылы, «№3 агротехникалық колледжі» КММ-де 2019 жылдың 20 ақпанында Ұлы Отан соғысының ардагері Айдархан Байкенұлымен дәстүрге айналған кездесу өтті.

          Аты аңызға айналған 28 панфиловшылар дивизиясының құрамында  Кенес Одағының Батыры Бауыржан Момышұлының қол астында әскери қызметін өткізген Айдархан Байкенұлы 1925 жылы 28 желтоқсанда туған. 1943 жылы әскер қатарына шақырылып, 37 қосалқы атқыштар полкінің атқышы ретінде қабылданды. 1943 жылдың мамырынан 1945 жылдың наурызына дейін 8-ші гвардиялық дивизия инженерлік-саперлік батальон бөлімшесінің командирі. 1945 жылдың наурыз айынан бастап 1945 жылдың қазан айына дейін 403 және 10 жеке инженерлік-саперлык батальон бөлімінің командирі болды. Майдангер ІІІ дәрежелі Даңқ, І және ІІ дәрежелі Отан соғысы ордендерімен және медальдармен марапатталған.

        Кездесу барысында студенттер өздерін қызықтырған сауалдарын қойып, қарт жауынгерді әңгімеге тартты.   Айдархан Байкенұлы кездесу соңында жастарға халықтың қанымен, көз жасымен, ерлігімен келген Жеңісті қадірлей, қастерлей білуге шақырды.

        Колледж директоры С.Сейітқалиева ардагерге алтыннан да қымбат уақытын бөліп келгені және қызықты әңгімесі үшін алғыс білдіріп, естелік сый тарту етті.

        Бұл әр студенттің жүрегінде ерекше орын алған кездесу болды.